上星期政府一口氣宣布咗一「抽」諮詢同法定組織嘅委任名單，當中以曾經被老董排於班子外嘅Anna姐（胡紅玉、圖）被委任成為法律改革委員會較為矚目，令好些人以為Anna姐又再得到上眷被重新納回建制當中。
本進士嘅睇法則剛剛相反，我覺得畀個咁嘅委任Anna似豬頭骨多啲！點解呢？話說法改會係一個屬於多嘢做嘅委員會，喺法律界屬「猛人」級而又肯做「義工」嘅人實在唔多，Anna係知識產權法嘅專家，又曾任立法局議員同平機會主席，雪糕仔司長搵Anna入去都係純以「利用」角度考慮。真係重新得寵嘅就入咗策發會啦！

呀！講開法改會，本進士又可以同大家分享吓特區政府「斬腳趾避沙蟲」嘅招數。話說法改會成立於一九八○年，時至今日，已就唔同嘅法律範疇發表咗五十份研究報告書，當中有二十六份已被落實製成法例。聽起上嚟好似幾好成績，但如果由回歸後開始計，大家就知政府有幾「茅」。回歸後法改會推出過十八份報告書，當中只有一份落實為法律！點解會咁嘅呢？好簡單，回歸後《基本法》對立法會議員提法案有好嚴嘅限制，議員基本上冇機會提，只可以等政府提案嘅時候同政府慢慢玩。為咗避免議員「有機可乘」，政府內部已有「默契」，就係如非「死人冧樓」都唔會提案。就係咁，回歸八年香港嘅法律變得非常落後完全追唔到世界上嘅發展。
不過，最可借係法改會「義工」們辛苦做嘅報告書擺晒喺度等到過晒期。難怪本進士嘅律師朋友話𠵱家肯接受委任入法改會嘅，都只當法改會係同「老爺、奶奶」（法官）們打交道嘅途徑。
唉！不如「摺」咗法改會佢啦！何必浪費大家時間呢！
倔頭進士

傳真︰2623-9278
電郵︰[email protected]