當年今日
關於我們

【10蚊豬肉分兩餐】慳出一個溫暖家庭 吳日言爆喊多謝老竇節儉

蘋果日報 2017/06/16 00:01

吳日言節儉

吳日言(Yan)去年榮升人妻,同拍拖17年男友Barry拉埋天窗,喺沖繩舉行婚禮。單親家庭長大的Yan,當日由爸爸陪住出嫁,父女感情一切盡在不言中,但Yan自爆佢和爸爸關係原先並不理想,直至02年愛犬win win出現,父女關係才有所改善。二人日前接受《蘋果》訪問,Yan爸認以前好谷氣,Yan則含淚多謝爸爸的愛錫。
今年33歲嘅吳日言,入行十多年一直星運平平,可幸感情生活平坦而幸福,去年10月Yan與拍拖17年男友Barry順利走到終點,正式榮升做人妻,更公開表示有造人大計,希望讓Yan爸盡快有孫抱。
單親家庭長大嘅Yan,兩歲起就同爸爸一齊生活,但原來兩人一直好少溝通,至02年養了史納莎愛犬win win,Yan同爸爸關係先至拉近,15年內親蜜關係從此不變。Yan笑住話:「嗰時呃爸爸係幫朋友照顧,但一擺就擺咗14年。」
講到細個同爸爸相處,Yan話:「嗰時好細個,好多嘢唔係咁記得,但記得爸爸成日都眉頭深鎖唔講嘢!」Yan爸即答話:「佢細個已經好硬頸,好難溝通,自己成日要做嘢,返屋企就係煮飯,返到屋企都好少傾偈。」
退休9年嘅Yan爸,以前喺政府部門工作,返工放工好規律,Yan笑住話:「我細個每晚9點就上床瞓覺,我記得有次我問爸爸,我哋係咪好窮,因為餐餐都食芽菜煮豬肉,仲成日話10蚊豬肉分兩餐,因為以前唔識諗,o依家做咗人老婆,知道照顧一個家真係好辛苦,同埋節儉幾時都係美德。」
Yan爸就無怪Yan,仲幫口話:「嗰時年紀太細,只有幾歲大,一定唔會明白。」難得Yan爸體諒,咁細個嘅Yan有冇邀到老竇?Yan爸咁答:「鍾意玩,讀中學去玩又呃我去阿媽度,俾我知道咗唔係,我就話如果唔返屋企,以後都唔准返,咁佢都有趕返嚟!」之後又試過因為經常傾電話,俾Yan爸扯甩電話線阻止。
聽到爸爸吐冤屈,Yan即雙眼通紅,然後哽咽話:「o依家梗係知節儉係美德,好慶幸同自豪一個男人打份工,可以照顧到我咁大個,退休仲可以有兩個物業,俾到我一個溫暖嘅屋企,所以一直觀念錯,要向佢好好學習。」Yan又話:「結咗婚有家庭,我先知我真係好錫我爸爸,見到佢退咗休好開心,爸爸又成日見到我笑,以前一路唔明原來係我,爸爸作風就一向都係咁。」

場地:美樂士多
empty
(攝影:葉君海)
empty
Yan話以往同爸爸關係有段距離,自從養咗愛犬拉近咗距離。
empty
empty
Yan爸話以前返完工就煮飯,兩父女好少傾偈交流。
empty
empty
因為爸爸好慳,Yan以為屋企好窮,長大先發覺係能夠節儉美德。
empty
empty
empty
講到爸爸獨力湊大自己,Yan終於忍唔住喊。
empty