中國08奧運殺到埋身，香港人可以開始報名訂飛，有冇飛就要等抽籤；達官貴人想入場睇開幕盛典，原來都唔容易，據聞年屆81歲嘅全國人大代表吳康民，今年3月喺北京開兩會時，話自己都一把年紀，做埋呢屆就唔玩，卸任人大嘅最後心願，係想下年可以去北京睇奧運，親身參加呢場盛事。
一個人入場睇咁悶，康民叔希望其他35位港區人大都有份。據聞在場嘅人大常委會秘書處人員聽完呢個意見冇回應。梗係啦，全世界都撲緊飛，邊可以話派就派？身為政協嘅田北俊同陳鑑林都話想睇，由於中央冇表示，所以都要周圍撲飛，田少淡淡定話，「要搵就搵到」。八方同意，有錢使驚冇飛？