四叔李兆基作為「亞洲股神」，年薪有幾多？咁就要睇恒基地產（012）最新出嘅第二份中期報告（截至6月底），喺舊年7月至今月6月嘅09年度，四叔嘅年薪係1387萬元，比08年度加咗成31.98%；喺金融海嘯之下四叔有呢個加薪幅度，真係恨死隔籬。
咁佢兩位公子又收幾銀呢？仲係單身寡佬嘅大仔家傑，照舊係董事局中底薪最高嗰個，連退休金供款收1417.9萬蚊。
至於而「千億新抱」個老公、仲係一身外父相嘅細仔家誠，就收1149.7萬銀，少過大佬啲啲咁啦！不過，兩兄弟嘅加薪幅度其實好微，分別得嗰2%同1.4%，冇老頭子咁多。唔通四叔見又抱女孫高興得滯，所以加多啲人工獎勵自己？

林高演一個人袋3330萬

至於老臣子林高演又點呢？袋咗3330.2萬蚊，四叔三仔爺加埋先多佢六百幾萬，點解咁貴？因為有酌情花紅2560萬銀囉，不過再睇番上年條數，林生其實減咗人工，事關佢舊年係收4156萬，一個人貴過主子三仔爺。今年就因為花紅少咗成1100萬，令佢減薪兩成。如果單睇林生嘅底薪，其實加咗1.5%，有720萬。點解加幅同老細爭咁遠？呢啲可能叫做主僕有別嘞。

李華華
mailto:[email protected]