【新增動新聞】

洲際盃A組次輪，葡萄牙靠基斯坦奴朗拿度（C朗）頭槌建功，一箭定江山，以1:0擊敗東道主俄羅斯，兩戰得四分。

賽前，C朗拖住一名坐輪椅的殘疾球僮入場，還親吻她的額頭。八分鐘，左閘拉菲爾古里路大腳斬波入禁區，俄羅斯中堅古迪亞舒夫失位，遠柱的C朗無人看管，輕鬆頂成1:0。C朗今場很活躍，多次在右路出現，試過傳中及射門，與薛迪索拉斯及貝拿度施華擦出火花。25分鐘，他主射罰球，雖然中目標，但被艾堅菲夫救到。其後米基爾施華頭槌一頂，C朗推波帶入禁區，一對一面對俄軍守衛，窄位一射，又被艾堅菲夫救到。葡萄牙半場領先1:0，他們上半場控制大局，控球高達62%，至於俄羅斯很難打入葡萄牙禁區。

換邊後，葡萄牙仍然佔上風，50分鐘差點擴大優勢。米基爾施華接應右路傳中，力壓對手一頂，艾堅菲夫反應快撲出。58分鐘，葡萄牙快速反擊，貝拿度施華推到右路傳中，米基爾施華再施展頭槌攻門，被對手及時解圍。葡萄牙之後放慢節奏，到補時更加全軍退守。俄羅斯到補時才搶回不少攻勢，91分鐘，俄軍有個扳平良機，迪治基亞接應角球，力壓比比一頂，勁度十足，可惜高出。93分鐘，史莫洛夫右路傳中太貼門，被魯爾柏迪斯奧沒收。94分鐘，俄羅斯最後一擊，結果史莫洛夫的禁區外熨射斜出。最終，葡萄牙靠C朗在上半場的入球，以1:0擊敗俄羅斯，取得今屆洲際盃首勝。葡萄牙上場和墨西哥2:2，今場贏波後，累積有四分。C朗賽後當選今場最佳球員。