晨早就同一眾中國奧運選手出動嘅游泳選手傅園慧(火雞姐)，表演完畢就返酒店，過海底隧道嗰陣仲有警車開路。

下午近二時，身穿運動裝戴帽嘅傅園慧，同一女性友人步出酒店，即引來大批傳媒同fans影相，fans為數約二三十人。問火雞姐想去邊度購物？佢就話：「不知道，只是想到附近走走看看，購物一下。」咁諗住買乜嘢？佢就話唔知道。咁想去迪士尼嗎？火雞姐笑言：「迪士尼太遠了。」

講到話香港好多fans喎，火雞姐笑謂：「謝謝。」又稱市民都好熱情。火雞姐一邊行一邊受訪，越來越多人包圍佢。由於當時傳媒背向馬路，火雞姐即緊張地提醒大家小心睇車

包圍火雞姐嘅fans蜂擁而至，係咁索簽名同影相或送禮物，收咗兩袋禮物，有一袋仲係迪士尼袋裝住嘅。火雞姐亦友善地逐一為之簽名，其中有位楊小姐，等咗2日，終於攞到簽名，喜不自勝。

不過亦因為咁，火雞姐同友人寸步難移，連馬路都過唔到，搞咗五分鐘最後兩人折返酒店，火雞姐對友人笑謂：「都是我拖累了你。」又笑言:「我們還是上去泳池游泳好了。」結果真係返番上樓。