由吳家麗導演嘅電影《花街柳巷》噚日就上映，主演嘅許雅婷(Kabby)、符曉薇同埋吳家麗就去到九展，出席Kabby嘅fans聚會，一齊睇《花街柳巷》，現場包咗個VIP院，大約有20個fans同朋友去欣賞，而大會仲安排咗Jeana(何佩瑜)做神秘嘉賓，喺現場拎一個心臟蛋糕出嚟，Kabby就一刀插入個蛋糕。

喺訪問嘅時候，Kabby就話今次呢個fans聚會係睇佢第二次做女主角嘅戲，因為套戲噚日上映，所以Kabby想同fans、朋友一齊過呢個大喜日子，佢話：「今朝都有朋友打畀我，話套戲好恐怖，仲話有啲面對唔到我，話套戲太恐怖太血腥，仲話我真係一個男人。」問到怕唔怕嚇走啲fans，佢就話：「都有少少，今日都有男性朋友睇完套戲就取消同我嘅約會，疑惑緊我係男定女，因為我喺戲入面係陰陽人，令佢哋都好歷歷在目。」

講到拍呢套戲嘅時候，有冇遇到啲咩靈異事件，Kabby就話：「咁又冇，但戴上個假陽具嘅時候都好有趣，我都有影相留念，我戴咗之後不停咁好想望吓同摸吓，今次對我呢個新人嚟講，喺演技上係好大經驗。」Kabby又話唔會嚇走啲追求者，記者笑Kabby一陣啲fans睇完之後，就嚇到唔做佢fans，Kabby就話：「應該唔會嘅，應該會睇完之後，會知道我為部戲付出咗幾多，不惜一切被認定係男人。」佢又話唔怕被定形做三級片女星。