賭王何鴻燊四房千金何超盈今晚喺中環為時裝活動擔任模特兒，問到佢係咪正式第一次行騷？佢話：「都算係嘅，嚟到都有rehersal一次。」首次行天橋，係咪好有壓力呢？超盈話：「頭先個個行完返轉頭喺休息室度，其實我好驚，因為我都未開始行，但覺得個感覺係好好玩嘅，同埋Harris（MOISELLE太子爺陳柏熹）為咗今次咁努力，作為好朋友一定會支持！」

問到俾幾多分自己，超盈好謙答：「合格㗎咋應該……」問到下次再有人邀請佢行騷的話，點樣先可以打動到佢？超盈話：「一定要係好朋友囉！Harris事前都有安慰我，知我驚，不過就叫我casual啲，唔好太緊張。」

話晒首次行騷，點解唔叫媽咪細佬捧場？超盈話：「我都想，不過我聽朝就要趕返澳門。（係咪為咗選舉？）呢啲我唔講㗎喇，總之希望大家都會同我一樣咁支持我媽咪同細佬。」