旅遊界立法會議員姚思榮之前喺立法會特首質詢環節大彈香港公廁環境差，點名話中環街市廁所好肉酸，要求政府搞公廁革命，特首林鄭月娥表明有決心改善情況，曾任發展局常秘、被視為林鄭愛將嘅市建局行政總監韋志成隨即響應，佢喺網誌話中環街市公廁已經陸續做緊改善措施，環境好咗好多，佢仲親身落公廁視察，透露未來2樓行人通道將會有新公廁落成，考慮加入智能設施，唔通以後沖廁都可以聲控？
中環街市地面有2個公廁，韋志成話近皇后大道中嘅南面公廁已經拆卸，活化後成為休憩空間一部份，近德輔道中嘅北面公廁就會喺2樓新公廁落成後關閉。佢話之前聽過唔少意見話北面公廁地面濕滑又有異味，所以市建局今年3月起陸續做改善措施，包括加裝冷氣、工業用級別嘅大型抽濕機同離子空氣淨化器，確保公廁乾爽同減少細菌滋生。

廁格換埋新馬桶

公廁入面亦安裝大型抽風系統同活性碳濾網，透過抽風機將公廁異味排走，排氣管道嘅出口亦刻意安排，氣味經過濾後排送到街市中庭出風口，避免排出行人路；廁格入面嘅馬桶亦已經換咗，呢個月底前市建局仲會將所有尿槽同洗手盆改為不銹鋼廁具。
佢自爆專登入公廁視察，發現異味同地面濕滑問題已經改善，估唔到中環街市活化拖咁耐，反而中環公廁革命搞得咁快喎！

李八方