今年係港台十大中文金曲40周年，今年非常破格——頒獎禮於下午二時至四時舉行，係，係下午舉行，而且，電視台不設直播，港台32台有得播，但係delay一個半鐘；港台第二台就有得即時收聽。仲有就係，今年冇金針獎。

頒獎禮今午於將軍澳香港知專設計學院舉行。

1525 大會宣佈今日頒獎禮完成，部分獎項及表演項目會留喺2018年1月4日「我和你音樂會」假九展Star Hall舉行。

1520 銅獎C AllStar講感言﹕「好開心好難得，呢3個兄弟陪我行咗8年，今年年頭喺最好感情時休團，目的係行更遠嘅路。自從宣佈後，多謝樂迷及唔同嘅人支持，好多勇氣行去comfort zone，我哋會返嚟嘅，等我哋，唔會呃你哋。」

1518 雷頌獎頒發全年最佳樂隊/組合獎，金獎Supper Moment、銀獎Dear Jane、銅獎C AllStar。

1507 第11首十大中文金曲係ToNick嘅《長相廝守》，主音恆仔話：「大家好我哋係Tonick，多謝監製、多謝梁柏堅、多謝薑檸樂，我哋研究一首好嘅歌。仲有多謝呢套電影公司。」

1505 林奕匡憑《難得一遇》捧走第10首十大中文金曲，佢喺台上公開多謝太太。

1503 十大中文金曲第9首得獎歌，吳業坤同JW合唱嘅《原來只因心愛着》。

1500 公佈銷量歌手大獎得主：男歌手李克勤、女歌手容祖兒、組合Twins，克勤上台講感言時笑言今日因為唔使唱歌，反而係表演講多謝。

1457 第7首十大中文金曲係周柏豪嘅《天網》，佢喺台上笑住向陳詠謙追歌。第8首得獎歌為AGA嘅《3AM》

1450 CASH最佳創作歌手獎得主林奕匡

1448 林慕德頒發第5及6首十大中文金曲，第5首得獎歌曲係許廷鏗嘅《痛醒》，許廷鏗話「真係冇估過（得獎）」，佢話原來隻歌仲有個「孖生姐妹」未出街，就係吳若希嘅《麻醉》，佢仲多謝舊老闆、星夢嘅Herman。第6首係C AllStar嘅《兄兄我我》，佢哋話冇諗過首歌會得獎。

1440 鍾舒漫講感言時話：「今年有朋友同我講，原來我係鍾意跳舞，我都唔好意思講我其實跳唱咗10年，但係開心事，連唔太留意自己嘅朋友都睇到，應該係進步咗，多謝港台DJ，公司英皇娛樂，今年強勁嘅團隊同Fans，我會繼續努力。」

1437 伍樂城頒發全年最佳進步獎，金、銀、銅獎得主分別為：鍾舒漫、Hana菊梓喬、林欣彤。林欣彤講感言時，公開多謝老闆王祖藍。

1434 顏卓靈講感言：「我喺電影圈仲係好後生，但第一部作品後唔計做新人。今年入樂壇係一個陌生圈子，唔認識好多前輩。多謝呢個獎，多謝幕後阿柄、Edward Chan，金培達，多謝呢個圈接受我，仲有公司。我手仲震緊，多謝爹哋媽咪，鍾意我音樂嘅所有前輩們，觀眾們，聽眾們，我會繼續努力，繼續進步。」

1429 陳詠謙頒發最有前途新人獎，金、銀、銅獎得主分別為：顏卓靈、王嘉儀、伍富橋。伍富橋講感言時話：「好緊張，冇諗過攞呢個獎，多謝老闆、屋企人、歌迷，由我參加《超級巨聲》鍾意我嘅歌迷。」王嘉儀則指做新人亦都唔容易。

1423 陳輝陽出場頒獎第3及4首十大中文金曲，第3首得獎歌係陳柏宇嘅《霸氣情歌》，佢喺台上放閃話：「好開心，其中一個原因喺代表我同老婆，霸氣有啲自大，我哋愛情冇人取代到。」而第4首係由Gin Lee嘅《空姐》奪得。

1419 向雪懷出場頒發第1及2首十大中文金曲，第1首係李克勤嘅《失魂記》，佢感謝「左麟」同作曲填詞人等。第2首得獎者係衛蘭嘅《天敵》，佢上台攞獎時送上擁抱，佢話估唔到會得到人哋認同。

1415 JW講感謝詞時表示自己同AGA第一次攞呢個獎，覺得好開心，AGA亦感謝經理人同歌迷。

1410 頒發優秀流行歌手大獎，得獎者包括：許廷鏗、李幸倪（Gin Lee）、陳柏宇、衛蘭、陳奕迅、容祖兒、李克勤、JW王灝兒、王菀之、周柏豪、AGA江海迦，由廣播處長梁家榮頒獎