吳若希首《越難越愛》洗腦洗到拎金曲金，煩膠指數爆燈，連動主播小汶、小Von都嗌投降。要解除魔咒，唯一方法就係硬食另一首洗腦歌。估唔到，機會咁快出現，相信讀者的FB已被以下這首「粗口歌」洗版。

「X得哩，能得你，呀全盒吖梗吖有呀X得你！」

穿上唐裝的韓星李光洙，夥拍《RunningMan》拍檔金鐘國，吖唔係，係「女版金鐘國」魯芬BB至真，合唱一曲惡搞版《鳳陽花鼓》。原來兩人幫果汁糖拍賀年廣告，完全唔啱音歌詞固然是精髓，而長手長腳的光洙跟豬圓玉潤的魯芬BB也堪稱絕配，彼此手腳唔協調到了一個共識，發揮到互相磨合的化學作用。兩人身後還隱藏兩個紅衣人，跟紅色背景完全黐地，兩人會隨歌詞搬出相應物件，如唱到「個個攞A」時，紅衣人會搬出一個巨型「A」字；唱到末段又端出兩支仿製糖果包裝的巨型彩炮，發射出金光閃閃的碎紙。整體廣告一個字，Raw！

筆者自問學識淺薄，廣告學還是請教畢明好了。這裏只想說，有時一個成功廣告，並非必定要倚靠大明星（好了，李光洙也是大明星），創意還是最重要。如較早前就有另一個糖果廣告，同樣是香港、韓國明星合作，製作程度認真得多，又拍音樂MV，又有發佈會。但杜秋棠只記得明星背後的是非，已忘記他們為那糖果品牌賣廣告。

杜秋棠自細喜歡這隻糖果，一直覺得其名字像粗口，尤其說到誰會在乎（whocares？）或罵人很囂張時，均大排用場。想不到時隔二十多年，終於有廣告奇人想到這條絕世好橋，安排唔識廣東話的李光洙唱出唔啱音歌仔，讓粗口歌變得合理化。執筆之時，製作《話你戇×怕你嬲》MV的DDED，原來比杜秋棠快了N步，炮製了「689版」惡搞廣告，料別成為廣傳巨作。

撰文：杜秋棠@抽水站
https://www.fb.com/freakingwestlook