由基督徒高皓正（高主教）同出櫃何韻詩幫ViuTV喺愛爾蘭拍嘅《跟住矛盾去旅行》前晚繼續播，佢哋喺由禮拜堂改建成嘅餐廳中，埋牙傾同性戀問題，高主教送咗個有心、皇冠同兩隻手圖案嘅搖鼓畀阿詩，佢解釋話：「心係愛，皇冠代表忠誠，兩隻手代表友誼。」佢仲深情補充：「我唔可以代表任何宗教信仰，我代表自己，一個耶穌門徒，我嘅家庭都係信耶穌嘅人，我自己嘅教會，嗰一小撮弟兄姊妹，好想向你道歉，如我哋係有傷害過你哋，我覺得唔啱、唔公義嘅。我係好真誠同你講sorry，我相信神愛世人，唔係神愛直人，我覺得神係好愛你。」

欣賞對方

高主教嘅立場依然反對同志婚姻，但佢尊重阿詩取向，講到呢度，高主教哽咽兼落下男兒淚，佢同阿詩擁抱化干戈，雖然阿詩麻麻哋領情，但佢代表同志群組收高教主份禮：「我哋唔想要一個道歉，我希望個世界變得更加包容，大家可以去接受人哋同自己嘅唔一樣，做好自己之餘亦尊重其他人，我相信係我哋共同希望有嘅世界嚟嘅！」
馮仁昭噚日打畀高主教，佢話：「噚晚有睇，有笑有淚啦。」佢仲大讚阿詩：「我好欣賞佢冇歧視我，真係聽我諗法同分析再去回應，佢尊重我信仰同諗法。佢仲寫咗一篇文章，寫到我同佢相處，引伸到成個城巿，可以有同樣態度去尊重對方，而唔係硬邦邦去改變對方聽自己諗法。」
撰文：馮仁昭