台灣歌手A-Lin日前接受馬天佑邀請現身《蘋果》娛樂facebook專頁《娛果》嘅全新live節目《動識時尚》，唱住歌出場嘅A-Lin，話一直等緊一位製作人幫佢做一首廣東歌，不過當中有好多困難存在，做一、兩首歌唔係問題，不過要做專輯就好難。A-Lin雖然有好多fans，原來佢以前都係追星一族，其中一個偶像就係陳小春。
講到歌手喺宣傳期經常着嘅打歌服，A-Lin話以前會喺香港置裝，而佢平日打扮都係以簡單嘅T恤加牛仔褲，再加少少飾物。A-Lin同馬天佑傾傾吓，突然話：「其實這個節目很好，可以學到怎樣配襯衣服。」A-Lin仲自爆咗個小秘密，就係唔鍾意着襪，馬天佑即場聞佢隻腳，證實A-lin隻腳唔着襪都冇臭味。

透明袋易搵嘢

跟住A-Lin同馬天佑又討論沖涼問題，原來佢哋都係一樣唔鍾意沖涼，可以兩日都唔沖，佢哋都話因為本身唔易出汗，所以唔使成日沖涼。爆完小秘密後，A-Lin又拎出透明化妝袋，佢話透明因為方便搵嘢，但佢個化妝袋執得好整齊。