呢單嘢都過咗幾十年,燊哥重咁念念不忘,睇嚟嗰啲女仔真係攬得燊哥好實,但令燊哥遺憾嘅係,原來三十幾個女仔之中,燊哥冇一個睇上眼,佢忍唔住要話:「真係可惜,冇乜邊個靚!」
如果要講晒甘棠第嘅笑話,燊哥話要講兩個幾鐘都講唔晒,但佢都醒多個笑話,畀啲參加捐贈儀式嘅嘉賓。燊哥話,佢五叔何甘棠有十四個仔,其中一個叫世威、一個叫世猛,有一日呢兩隻馬騮考完試返嚟,威仔話佢考第三,猛仔話佢考第四,佢五叔就好開心,即刻喺個袋度掏咗幾塊金仔,諗住送畀佢兩個。
點知五叔老婆好醒目,識問佢兩個:「你嗰班有幾多人?」咁先發現,原來佢兩個嗰班得四個人,重要係最差成績嗰班,即係一個包艇、一個尾二!不過世威大個咗冇失禮,做咗港英嘅華民政務司。
唔少何甘棠嘅後人都有參加呢次捐贈儀式,佢嘅孫何鴻圖、何智聰同埋佢嘅外曾孫謝天賜就好努力,希望可以搵番晒甘棠第當年散失嘅家具擺設,將甘棠第還原。佢三個同八方講,幾廿年前賣甘棠第時,啲家當就畀家裏面嘅人分豬肉咁分晒,燊哥當時就買咗呢個屏風,但要湊番啲家當都好難,因為唔多後人好似燊哥咁捐番出嚟,好似客廳原本有四盞大燈,但淨係籌番兩盞,因為有兩家後人唔想攞番出嚟,要數嘅話,重有兩張地毯喺加拿大。
肥平就頒咗張感謝狀畀燊哥,重話希望佢善舉可以啟發港人,積極響應籌建