2012年發生的DR醫學美容事故，集團創辦人周向榮、女西醫麥允齡及技術室化驗員陳冠忠各被控一項誤殺罪。死者陳宛琳在抽血培植當天，一名陳姓醫生為陳抽血前查詢其病歷，及講解CIK療程的原理，控方在庭上播出當時長達8分鐘的錄音，醫生向陳提及療程主要用於保健，並指CIK療程於內地及日本亦有被使用。

醫生則向陳解釋CIK療程是抽取客人體內的CIK白血球細胞進行培植，CIK白血球細胞是用於殲滅身體內變異的細胞。醫生對陳宛琳指：「咁隨住你年紀愈嚟愈大啦，即係年紀嘅增長呢，呢啲白血球嘅細胞就愈嚟愈小嘅，咁但係我哋生活係而家嘅個咁嘅環境度呢亦都好多幅射呀，好多食物呀變異呀，咁呢所以我哋身體呢即係比以前比較更加容易會有變種呀啲細胞，咁呢而家就有呢啲咁。CIK細胞就喺我哋度呢，幫你抽啦，培植咗打番喺身體度呢，就希望概念上，就希望增加你自己嗰啲白血球嘅數目，去打嗰啲變異嘅細胞，咁呢就等身體唔好話儲存咁多唔好嘅細胞喺身體度」

醫生又對陳宛琳稱:「咁呢個療程其實喺大陸呀，內地呀同埋喺日本都有嘅，咁佢哋用嚟醫治癌症嘅，咁呢我哋個層面呢……我哋主要都係想攞個概念就係話想幫我哋嘅客人，即係身體健康，好似排毒咁樣，將身體唔好嘅嘢清除咗佢，咁呢就係一個保健品咁樣去調理番身體囉，咁所以我哋打嘅數目無幾億，可能幾百萬個細胞咁樣，咁就打番身體度，希望可以剷除啲唔好嘅細胞，等佢唔好困住喺一齊，因為驚佢囤積咗一齊就驚啲良變惡，咁變啲唔好嘅嘢出嚟咁樣囉，明唔明？」

醫生又指「OKAY咁就，如果無問題，呢張簽咗，咁因為呢張係主要係講話你啲病歷嘅啫，我哋主要係想做係即係推介俾啲客就係身體健康啲，我哋就唔想話，即係如果有啲上嚟醫病嘅我哋驚佢有太大嘅期望，咁所以我哋都係想做個保健嘅產品，所以就問清楚你啲病歷嘞，咁就都係身體健康無病嘅，即係其實主要想你簽番個名就確定呢個你講嗰啲係真㗎嘞咁樣」。