新鴻基地產（016）執行董事郭基煇（Adam）出名係單車發燒友，噚日佢就帶埋新地單車學院一班學生睇保誠國際單車賽，為香港單車隊加油，真係出錢又出力，香港隊亦不負眾望，再添一件彩虹戰衣。

Adam話，咁多年嚟，香港豆潤咁細嘅地方可以培育多位單車世界冠軍，是非常值得驕傲嘅故事，「好多人覺得場地單車很昂貴，但香港有一個國際級嘅單車館，而新地單車學院係一個平台，畀學生可以更容易接觸場地單車，追尋單車夢。」同時畀退役運動員延續自己嘅夢想，培育下一個彩虹戰衣得主。

Adam親自帶領超過20個單車學院學生同世界級嘅運動員近距離接觸，仲一齊到電視直播室了解運動賽事嘅直播實況，最後仲齊齊喺觀眾席觀賞賽事。港產彩虹戰衣得主黃金寶、梁峻榮、郭灝霆及牛下女車神李慧詩，更親身勉勵新地單車學院學生要堅持夢想，努力提升單車技術，成為港隊生力軍。