黃文藻設靈丨黃又南送別亡父泣不成聲 杜如風徐天佑送花牌悼念
蘋果日報 2020/12/25 21:11
黃又南黃文藻腦退化症
黃又南爸爸黃文藻因病離世，終年71歲，今日於大圍寶福紀念館設靈，明天辭靈出殯，移送富山火葬場火化。黃又南與家人今日到靈堂打點，喪禮以道教形式進行，黃又南的好友徐天佑、梁漢文、緋聞前度杜如風及陳果等有送上花牌。 黃又南幫爸爸揀選生前最喜愛的服裝陪葬，自己亦好想夢見爸爸，能父子傾訴。
身穿孝服的黃又南接受訪問，表示心情平復很多， 但接受訪問時仍傷心落淚，他最近兩星期也陪伴着媽媽：「一直陪住媽咪，希望過埋今日、聽日之後，媽咪同家姐會開心返啲，媽咪表面上唔想我哋睇到佢唔開心，唔想我哋擔心，但係始終都係佢老公，佢都冇話自殘，呢段時間都有陪住佢，我真係知道有啲嘢係要珍惜。」
雖然爸爸已患腦退化症一段時間，但又南指自己與家人沒心理準備，但爸爸離開亦是解脫，他眼泛淚光續道：「可能爸爸一直有咁嘅病，都係痛苦嘅事，咁樣諗會開心啲。」又南指處理爸爸身後事好低調，因為疫情及節日關係，感謝朋友關心，希望爸爸可以得到安息。
又南忙於打點爸爸後事，同事亦有幫忙協調工作安排：「工作唔會停晒，人總要去面對，而且我同自己講而家係一家之主，要撐住頭家。」又南強忍淚水提起去年爸爸的病況：「上年呢個時間，我都記得爸爸……其實有一段日子已經認唔到人，上年都喺醫院，其實個天好好畀我同爸爸……陪住佢，因為疫情關係，而且爸爸入住護老院，唔可以經常探望，嗰日朝早5點幾收到電話，我好愕然已經即刻趕去。」
對於爸爸有否心願想兒子可以為他達成，又南說：「希望做好工作，由細到大爸爸教我尊重人，要有禮貌唔好做壞事，我會keep住在事業做好啲嚟報答爸爸養大我。」爸爸會否希望又南成家立室，他回應：「暫時冇諗。」
黃又南與家人今日到靈堂為亡父打點。
黃又南爸爸黃文藻喪禮以道教形式進行。
緋聞前度杜如風送上花牌。
好友徐天佑亦有送花牌。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！