【名家搶先睇】但求不打科技戰(晉佳)
港股貿易戰馬雲阿里巴巴特朗普
美國發起對華貿易戰,喺大陸傳媒早就一句都不能寫,為維持社會、政局穩定,中國會不惜一切。越封鎖資訊,投資者就越唔敢買,最終為國捐軀嘅其中板塊就係券商股。傳統股份喺貿戰之下,亦可能作出多多少少嘅犧牲。
中國只加注徵收600億美金美國貨額外關稅,似乎想暫時息事寧人、拖得就拖。不過,拖,並不代表消極,中國buy time去全力發展AI、大數據科技,博美國錫身唔願意打真正嘅科技戰,出大招亦差不多到此為止。只要雙方冇踩入對方科技發展底線,大家喺賽道上各有各跑,總好過出真正嘅七傷拳。或許如 Google前中國區總裁李開復所言,中美未來科技發展有條件並駕齊驅。
近幾年AI、AR等等科技發展速度加快,多方面睇到實現能力,科技板塊長遠點都未止境。單計阿里巴巴提出「五新」(即新零售、新製造、新技術、新金融及新能源),其中「新製造」係指生產會由標準化產品嘅時代,變咗透過大數據去分析每個人喜好,然後工業式生產Tailor-made嘅產品;「新零售」以大數據分析,可以推銷一樣你從未買過、但你將會喜歡會買嘅產品,去達致消費升級;「新能源」係指每個人都有冇盡用、非24小時運作嘅電腦,未來可以透過出售電腦運算力賺錢,然後電腦運算力好似能源咁交易,用盡資源。再者,越嚟越近嘅無人車發展,長遠大量釋放物流效率同運載能力。AI發展慢慢會將上述事情變得foreseeable,就算只做到部分,已經夠顛覆。
https://www.facebook.com/advanceguy1