港股在期指結算前,繼續有大戶平淡倉,恒指升78點,收報12086,但成交依然薄弱,唔夠98億元。
中國海外(688)上午已出現異動,股價一度升至1.23元,升幅達6%,下午出現一手6000萬股成交上板,每股作價1.20元,較前收市價高出3.45%,涉資7200萬元,收市報1.22元,升5.17%。
Cookie話聽聞最近有大戶收集該股,但升至接近1.30水平便告回軟,噚日嘅大手成交上板,似乎係大戶收集行動之一,反映大戶可能想將成本價鎖定在1.20元水平。近期樓市暢旺,市場估計中國海外可從富豪海灣項目賺取4億元有多,有望大幅改善公司業績。不過,持有富豪海灣70%嘅富豪酒店(078)股價則原地踏步,收報0.13元,冇升跌。
聯通多歐資捧場
聯通(762)公布收購九省市業務後,股價連升3日,噚日勁升5%至7.35元。據聞ING唱好聯通,出報告話睇10蚊,唔怪得歐資買盤咁踴躍,成交有成1.73億元。
中國人壽同長城汽車就快上市,人保財險(2328)同駿威汽車(203)一齊勁升,似乎為兩隻新股上市造勢兼打氣,人保財險升4.85%至2.70元,唔排除有機會突破3元關;駿威則升5.8%至7.30元,再創新高。
駿威現價往績PE22倍,而長城汽車以9.5-12.6倍PE上市,計落唔算貴,相信認購反應唔會差。
阿 虎