早前同《蘋果》記者一齊去見達賴喇嘛嘅奇人李慨俠，日前忽然入稟小額錢債審裁處，向港府追討300蚊，案件預計下月中處理。
事緣李慨俠買咗神韻藝術團1月來港表演門券，呢個藝術團同法輪功有關，港府落閘唔放行，禁止部份團員入境，結果演出要取消；李慨俠要求港府賠償門票價值300元同訴訟費用，理據係港府妨礙文化交流活動，違反《基本法》第34條，剝奪市民享受文化自由。
李慨俠又呼籲其他買咗門票觀眾集體向港府索償，應該係首宗就神韻被拒演出向港府索償case。神韻藝術團原定1月27日到31日喺香港演出七場，共售出7,000幾張門票。