風水輪流轉，星夢一姐寶座洗牌再嚟過。原本係星夢娛樂CEO何哲圖(Herman)頭號愛將嘅鍾嘉欣，早排有指掛住同伍允龍拍拖，俾Herman打入「冷宮」，仲俾師妹吳若希(Jinny)攝位坐正，不過家陣嘉欣BB甩拖，形勢隨即嚟過大逆轉，佢除咗有得唱重頭劇主題曲同插曲外，年中無綫播嘅內地劇《武則天》，佢唱嗰首插曲《不顧一切》，過咗半年近排離奇重新拍攝MV，最難得係無綫竟然肯為呢個MV揼水六位數嘛！反而吳若希新歌就竟然要同胡鴻鈞首新歌一齊拍MV。

「凳」都未坐暖就要讓座，吳若希噚晚現身中大騷，撐同門胡鴻鈞場，對於公司厚此薄彼，Jinny就話：「其實我哋兩個MV都好揼本，走咗5、6個location，兩個MV一齊拍唔代表慳錢，因為兩個MV都有故事性，襯番首歌。」