【光復區會●富新】建制敗陣或成改革契機 新民黨墮馬新星：應反思是否次次被動撐政府
蘋果日報 2019/12/14 00:01
屯門甘文鋒光復區會富新選區
反送中政治巨浪下，建制派區選大敗，新民黨更全軍盡墨，28名新丁以至老將一個不留。其中在屯門「富新」落選的甘文鋒認為，建制派敗陣是選擇支持政府的結果，但敗選責任始終在候選人，認為今次是建制派改革的契機，除了不應再將政治與區政切割，更要思考是否每次都要被動地支持政府施政：「係唔係每次中央有國策出，我哋（建制派）又等政府推啲嘢，就支持呢？」，強調監察政府也是支持政府的表現。
記者 陳嘉裕
37歲的甘文鋒4年前起一擊即中當選屯門「富新」區議員，今屆卻在反修例風波下被落區不足半年的素人李家偉打敗，區會之路一屆止步。甘敗選後接受《蘋果》訪問，認同政府在反修例風波中處理不當間接令建制派大敗，稱選民用選票表達對政府的不滿，惟認為敗選責任最終仍在候選人：「政府固然喺成件事做得非常之差喇，我估全香港市民都同意……但從事政治，所有嘢都係自己選擇嘅，你決定去支持政府，咁政府做得差，政府係有責任，但到最後（責任）都係參選人或者候選人自己。」他坦言有選民曾要求他退黨後才投票支持，故選前已經預視很大機會落馬，對留黨決定不會後悔。
4年深耕細作不敵政治巨浪，甘文鋒直言對選舉結果感到失望，但不認為建制派應就此絕望，日後會否繼續服務地區則要視乎新民黨是否有意繼續發展地區工作再決定，另一個考慮是明年立法會選舉，該黨是否需要地區樁腳。
他分析，今次選舉已經出現質變，相信選民對區議員的政治立場要求會提高，建制派若期望下屆區選捲土重來，必須改變在地區「只談民生，不談政治」的做法，建議建制陣營在重要事件表達政治立場，「以後區議員會再辛苦啲囉，年長啲嘅人需要有社區服務，但青年人同中年人又需要你有政治立場上嘅表態，之後嘅區議會選舉兩樣都有……只做地區工作係一定無可能翻盤。」
不能再「只談民生，不談政治」
甘又認為，今次選舉將建制派缺乏政治論述的缺點盡現人前，大敗或許是建制派改革的契機：「建制派成日掛喺口邊，『尊重國家、一國兩制、愛國愛港』，大家都明白嘅。但呢個唔係一個論述嚟㗎嘛，只係表示你對某啲嘢嘅態度，究竟我哋希望香港點樣發展呢？暫時我哋都未提供到一個好明確嘅藍圖」。
他建議各政黨思考，尊重中央之餘，是否可作出政治表態：「係唔係每次中央有國策出，我哋（建制派）又等政府推啲嘢，就支持喇？如果未來要爭取更多香港人支持，係咪應該繼續係咁呢？」他補充，建制派經常指愛香港，但其實監察政府施政都是支持政府的表現，建制派可趁今次作為少數派的機會「實習」監察政府，同時監察民主派未來表現。
新民黨甘文鋒上屆在屯門富新一擊即中，但在反送中浪潮下，身在藍營的他敵不過政治風暴，區會之路今屆止步。黃耀興攝
新民黨今屆區選全軍覆沒，上屆在屯門富新一擊即中的甘文鋒亦敗於政治素人。黃耀興攝