曼聯三連敗，隊長朗尼報廢外，億元身價嘅全能中場保羅普巴，一樣成為網民批評對象，對曼城、飛燕諾，以致噚日作客屈福特，該法國國腳完全冇表現，網民甚至以「404 Not Found」來形容佢近期演出，無法同隊友連線起嚟。的確，普巴今季由祖雲達斯天價回歸曼聯，成為摩連奴重心球員，但近仗演出，網民都質疑有咩表現令佢值億元身價，睇嚟佢未來紅魔生涯更加難行。