銀娛（027）主席呂志和真係越來越可愛，每次現身都派金句。噚日喺呂志和獎頒獎禮，大家追住問佢點睇樓市，佢勸大家現時唔好炒樓，皆因「政府咁多辣招，指天椒都出埋，辣到你跳起！」

爆料話 「香港好多地」

食辣唔好，自住就得。呂志和認為，大家如果有需要，又有足夠能力，係應該買樓嘅。至於政府成日話要搵地，呂志和就爆料咁話，「香港好多地，多地到你唔信，你哋個個唔出聲咋嘛」，佢反問，香港需要幾多綠化地、棕地同農地呢？「咁多魚同海豚，係咪真係要救先呢，定係救自己先呢？」
上月澳門賭收增長麻麻地，呂志和就指，人民幣貶值對賭收嘅影響屬於政治問題，佢相信世界咁大，經濟自然有上有落，拋低多句「總言之，我哋穩紮穩打，唔使太擔心嘅，兩餐唔會有問題」。
呂生嘅兩餐當然唔會有問題喇，都話佢可愛㗎喇。

李華華
mailto:[email protected]