RedStone二樓的海景至無敵，無樹遮擋，見海又見燈飾。至於價錢算中上，$1,060兩位共3道菜，頭盤有以捲壽司方法做成的菠菜蟹肉煙三文魚卷、翡翠螺伴以改自墨西哥菜的泰國酸甜醬芒果沙沙，還有以三層香脆薄酥皮包住希臘植物雅枝竹心的肉汁枝竹包，賣相精緻。主菜亦有3款選擇，分別有青芥辣焗龍蝦伴天使麵、扒牛柳伴野菌忌廉薯，而最好味係焗羊架伴意大利甜心粟米餅，因為RedStone的扒類以美國訂購的烤爐炮製，溫度可以高至1,000度，在短時間內令扒肉外層熟又鎖住內裏肉汁，再加埋甜甜的粟米餅，好Sweet呀！最後還有甜品組合，其中薰衣草泡芙充滿花香，甜蜜到漏！

RedStoneBar&Grill（27227050）　
地址：尖沙嘴中心G7&UG17號舖

漢堡包由06年興到𠵱家，帶情人去食漢堡包一定最潮！英式餐廳Bulldog's的情人節套餐價錢幾大眾化，$398/2位共3道菜，主菜有英國人至愛的漢堡和炸魚薯條兩款選擇，絕非快餐店貨色，其中邱比特漢堡成12cm厚，麵包好似塊多士咁脆，手絞免治漢堡扒有咬口，兩個人食都夠。炸魚薯條炸得外層香脆之餘，能保持內裏魚柳鮮味，好軟熟，薯條飽滿軟綿綿，仲有心形千層士多啤梨班戟和雪糕芝士餅兩款甜品任君選擇，全個餐樣樣食物都係心形，實甜到入心啦！

晚上9點有LiveBand表演，大唱情歌，喜歡熱鬧的情侶記得捧場！

Bulldog'sBar&Grill（23116993）
地址：尖沙嘴中心G5&UG15號舖

LaVilla的情人節套餐每位$688，頭盤連主菜及甜品共8道菜，每道菜都份量十足，單單頭盤就用上原隻中號南非鮑魚、平日單買要$55隻的法國生蠔、挪威三文魚及波士頓龍蝦。主菜就有釀滿法國加拿大蟹肉的黑菌焗蟹蓋，蟹蓋成7cm闊，仲有大塊荷蘭小牛柳和酥皮焗石斑柳，點會唔夠飽！

LaVilla（27240707）
地址：尖沙嘴中心G28號

別以為墨西哥菜只有脆片，其實是集不同國家元素的菜式，充滿驚喜，實令你的情人意想不到！主菜有3款選擇，例如以挪威三文魚和澳洲海蝦肉手打成肉丸，再以三文魚骨和番茄汁煮成，肉丸鮮滑好特別！更特別的是蘆笋意大利飯或牛柳配羊奶芝士，味道出色。最後加上豐富四式甜品，兩人Share食實甜到漏。

DonJuanMexican（27227101）
地址：尖沙嘴中心G6&UG16號舖