無綫嘅《萬千星輝頒獎典禮》將會喺今晚舉行，有傳今年嘅頒獎禮之所以喺1月舉行，原因係要等埋台慶劇《溏心風暴3》，到時順理成章拎大獎。點知無綫今次計錯晒數，原以為搵番劉家豪梅小青，再加埋《溏心》班底（即夏雨、李司棋、關菊英、米雪同阮兆祥）RE-U再拋大堆金句講下爭產嗌下交就收視爆燈，sorry，就連師奶都對金句厭倦，收視仲全面低收。

如果唔係靠陳敏之胸壓唐文龍／唐文龍胸壓陳敏之，連場床戲不倫戀加埋正媽怒摑兼鬧個女：「你去做雞啦！」睇嚟好難有人留意到。結果機會梗係去番其他劇集身上，《蘋果》收到風，無綫高層最初決定咗視帝係俾王浩信，由《EU超時任務》開始，明眼人一睇就知道已經舖路俾王浩信上位做視帝，去到《踩過界》嘅時候，擺明就係一張靚牌，難得有機會，佢都有俾足心機去做。

點知人算不如天算，本來做硬視帝嘅王浩信，突然爆出話佢同女拍擋關係親密，搞到同陳自瑤婚姻亮起紅燈，雖然之後兩公婆出嚟否認，但係形象點都有受損。跟住《降魔的》彈出爆紅，成班高層都覺得好意外，估唔到竟然咁受網民歡迎瘋狂洗版，個個都留言話要力谷馬明做視帝！

有知情人士仲話本來啲高層依然諗住俾個視帝王浩信，馬明就分到「最受歡迎電視男角色」安慰獎……呢個情況之前試過㗎，同樣係發生喺馬明身上，嗱嗱嗱，就喺2012年，馬明憑《On Call 36小時》嘅張一健殺入視帝最後五強，但係結果俾咗個「我最喜愛的電視男角色」佢，視帝由三度封帝嘅《大太監》黎耀祥捧走……之不過呢次《降魔的》走勢依然好凌厲，又喺一啲民間頒獎禮一面倒咁橫掃大奬，然後又收到order開續集，加上今年視帝視后又係投票，為咗唔再俾人鬧造馬，大有可能出現變數，一時之間王浩信由坐定粒六變50/50。

精選娛聞，喺晒《娛果》
http://fb.com/appledailyent