無綫前日發出內部通告，指年底將裁減約350人，佔員工總數一成。受影響員工集中於美術部、幕後工程及維修等部門。昨日香港通訊業人員協會發出通告，將向無綫電視僱員講解勞工權益及促請無綫馬上停止裁員，並向無綫電視僱員派發單張，講解勞工權益，隨後再到將軍澳電視廣播城正門請願。

今日下午3時多，8位協會人士在將軍澳電視廣播城員工穿梭巴士站，向上、下班的無綫員工派發單張，部份無綫員工未有理會，而單張上印上「無綫毫無企業良心」，又指「無綫作為大台，竟然帶頭不斷裁員，實在使人氣憤。香港通訊業人員協會不希望香港的電視業員工不斷被裁員折磨。」不過在單張上，「無綫」寫成「無線」，電話更只有7個號碼。

其後，協會人士移師至將軍澳電視廣播城門外，拉起「沒有企業良心責任 罔顧員工生計不顧」的橫額，更高舉「無綫年年裁員 夥計日日擔心」、「反裁員 保飯碗」、「履行社會責任 收回裁員決定」，並叫「無綫大企業，年關裁員無良心，蝕錢一年即裁員，懶理過去賺大錢」口號。接着，香港通訊業人員協會理事李美芝表示：「今次目的係為工友爭取權益，因為我哋剛才巴士站派發咗單張同接觸咗一啲工友，今次無綫電視裁員，我哋今次嚟想接觸更多工友，希望呼籲吓受影響嘅工友嚟搵我哋幫手，我哋會協助佢哋。」

問到近日收到多少工友的求助？及有甚麼訴求？李美芝說：「我哋得到一個獨家消息，所以我哋過咗嚟呢邊，會員話公司將會發裁員信畀佢哋，佢哋好擔心裁員問題，自己會唔會係被裁員嘅一個，所以聯絡我哋尋求協助，噚日已經收到5個求助，我哋睇吓有乜嘢可以幫到佢哋，亦都諗住將會有啲行動，就係向無綫出信約見管理層，同佢哋商討吓點樣可以幫到工友，因為我哋角色係協助工友同公司之間嘅橋樑，為民生、為工友嘅權益，希望透過今次事件幫工友爭取到合理賠償。」問到他們會為工友爭取甚麼權益？李美芝說：「除咗裁員之外，睇吓公司有冇對佢哋有不公平待遇，正常勞工補償之外，仲要爭取代通知金、特惠金等等。」

是否想要求裁員決定押後至農曆年後？李美芝表示：「係呀，因為工友擔心緊過年前，突然收到遣散信會好徬徨，希望嘗試透過公司商討吓呢個問題，睇吓可唔可以協助到工友，同埋睇吓公司個問題喺邊；繼亞視裁員潮之後，無綫一直都賺緊錢，咁多年都賺緊錢，無端端今年蝕錢就裁員，同埋裁員人數唔係少，都有10%，大概350人左右，所以我哋希望透過同管理層會面幫到手，聽日會出信。」會約見無綫行政總裁李寶安？她表示：「我哋透過工會聯絡番管理層，幾時見都要等無綫回覆。」

提到在協會派發的單張上，印了只有7個字的電話號碼，會否擔心工友未能聯絡他們？李美芝表示已經作出更正。對於工友對他們派單張，反應未有太熱烈，李美芝說：「香港通訊業人員協會都有無綫員工，我哋會嘗試同會員聯絡。」協會中有幾多人是無綫員工？李美芝說：「10至15%，（大約幾多人？）而家統計唔到畀你，（整個協會有多少人？）我哋冇準備要統計數字，（10至15%從何而來？）事後我哋再通知番你哋。」

最近反送中事件令各行各業組織工會，或會籌辦罷工，問到香港通訊業人員協會有甚麼看法？李美芝只說：「基本上我哋會睇番工友嘅訴求，然後我哋同管理層聯絡咗之後，我哋會睇吓回應點樣，先至再決定行動。」

採訪：黃曉妍

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇