蒙嘉慧（YoYo）、陳敏之、歐陽震華（Bobby）、楊思琦同楊秀惠等一班《法證先鋒II》嘅演員噚日喺九龍灣EMax香港保齡球城打保齡谷新劇，成班演員分兩隊比賽打保齡，班女仔球技唔多掂，但一味以服裝取勝，當中陳敏之、楊秀惠、郭少芸都着晒小背心，不過郭少芸為免走光，冇落場比賽，不過到玩花式保齡球賽時，佢就俾Bobby老屈上場，但佢都唔輸蝕，要Bobby孭住先肯玩。

帶病上陣玩到癲

陳敏之同楊秀惠唔怕走光大獻球技，其中陳敏之最搏命，竟然任由黃長興同陳智燊觸及胸部，挑戰難度，大玩人肉掟保齡球。
事後陳敏之仲話自己有感冒，但覺得着小背心比較靚，佢仲話：「我都冇嘢睇，不過佢哋抬起我時都驚走光，因為頭先個設計都唔係咁。」有病仲玩到咁癲，馮仁昭真係服咗佢。
對於網民狠批佘詩曼主唱《法》劇嘅插曲超難聽，Bobby就力撐阿佘話：「雖然我未聽過首歌，但係之前聽佢唱過卡拉OK，佢唱歌都OK。」而Bobby稍後亦會唱新劇《尖子攻略》主題曲，佢會唱R&B同rap嘅crossover版，仲歡迎大家批評。