劉德華相隔八年再踏紅館舉行跨年演唱會，今日台灣《蘋果》報道指華仔原來已向台北小巨蛋申請明年10月檔期，預計舉行8場。據知，申請計劃係每開三場休息一日，加上搭台及拆台時間，合共申請14天，惟館方最後以「期間太長」為由不通過申請。

華仔所屬嘅台灣映藝昨日回應台灣《蘋果》謂：「之前確實依規定向台北小巨蛋申請2019年10月檔期，但幾周前被通知小巨蛋無法安排，我們會繼續申請其他檔期，希望能早日在台灣演出。」

其實台北小巨蛋過往曾經要求周杰倫將申請嘅9日檔期改為7日，當時周杰倫放棄咗申請，直到去年先喺小巨蛋開4場騷。至於小巨蛋嘅批場準則究竟係點，其實大家都唔係好清楚，事關張學友去年2月申請14日檔期又成功獲批。

另外，華仔香港嘅紅館跨年演唱會噚晚輪到張繼聰同老婆謝安琪，而日前同容祖兒等人去睇騷嘅蔡卓妍（Sa），噚晚就威威豬咁喺Ig大晒過去同「四大天王」劉德華、黎明、郭富城、張學友嘅合照，唔少網民都留言話好羨慕。阿Sa留言：「經過我多年嘅努力，鍥而不捨嘅精神，終於畀我集齊四！大！天！王！嘅合照」之後仲有hashtag寫「#同啲同學分黨分派#細個發夢都估唔到#大個竟然可以集晒佢哋郵」等字句，睇得出佢真係好鬼開心！

精選娛聞，喺晒《娛果》
http://fb.com/appledailyent