沙田馬場今日（16日）頭場隻初出馬「正陽清風」同前馬王「蓮華生輝」同主，經典綵衣再現綠茵草場，會特別引人注意。

「正陽清風」處子戰由現年27歲的Tommy貝湯美策騎，同場對手之一嘅「飛雲騅」首兩仗都由佢壓陣，上仗同場更殺入一席季軍，今仗由莫雷拉接手，但原來「正陽清風」幕後早就決定以今場「試水溫」。

呢匹三歲馬嘅賽前晨操亦由Tommy一手包辦，順理成章由佢出戰，所以今場Tommy並冇揀馬，而雷神亦冇「搶馬」。

「蓮華生輝」稱霸香港短途賽事嘅年代，Tommy仍只係一位見習騎師，但佢同呢件綵衣的確有多年嘅關係。

「蓮華生輝」退役後，馬主冼鏡煜再養過一匹「信是有緣」（已退役），初出一仗正正就由騎者執韁，即喺1200米跑入亞軍，當時係13年5月初，亦即係Tommy首季嚟香港客串。

事隔五年，Tommy話對「信是有緣」仍略有印象，最感激嘅就係馬主同姚本輝肯同佢再續前緣，呢份情誼的確好有意義，至於「正陽清風」可唔可以同「信是有緣」、「蓮華生輝」（當時一出即勝直路賽）一樣，初出即有表現呢？

季後離港返澳洲的Tommy對此顯得較為審慎，佢話呢匹馬只屬初起階段，但今場勝在抽到10檔，出閘後可以貼看台一邊嘅外欄競跑，對冇出賽經驗嘅賽駒總有幫助，加上退出埋隻「洪荒之力」，全場出馬數目減至11匹，「正陽清風」最終跑得出色亦都唔奇。