其實民政事務局（民政局）近年都在推行「青少年內地考察團資助計劃」，由2008年起更擴大資助範圍，同時惠及本港大專生在內地實習的項目。今年撥款總數460萬元，合共提供645個資助名額，即係平均每位可獲贊助7,000大元，套用我適才的邏輯，點解唔係啲有所得益嘅學生畀返錢出嚟？就當呢啲係社會人力嘅投資行為，咁到底我哋納稅人啲錢，其實係贊助咗啲乜嘢明日棟樑、可造之才，又或那些父母的子女？有間專門安排港生到內地實習的機構，或可為我們提供端倪。
該機構除獲得民政局其中70個的資助實習名額外，亦有額外提供近千位自費參加（這才像樣）的實習名額予各大專生申請。據悉，學生所獲分配有實習空缺的公司都不乏內地大企業，照理父母亦大可放心，可惜，只不過是出發前的簡介會已經惹來家長積極踩場，擅闖講座會場之餘，更認真提問，而發人深省的深度問題包括：「係咪有專人會跟足全程睇實我個女？」（呢位太太，乜你個乖女咁細個就有「癡呆症」，會蕩失呀？）「飛機墜落點算？」（係囉，若地球爆炸咁點呀？）「返大陸係咪要自備拖鞋呀？」（最緊重係自備個腦囉！）
倒還是有些父母直接了當，只問：「我可唔可以跟埋去實習呀？」（梗係好啦，閣下確係要重新實習一下點樣做人父母。）可惜，家長始終不能隨行，不過參照過往經驗，不少家長會天天致電子女問安，全天候密切監測。曾經有實習生未能即時聯絡，嗰位太太已嚷着個仔可能遭遇不測，且已準備致電三條九同中聯辦求助。有其父母必有其子女，實習生的表現同樣教人嘆為觀止，有人會要求公司在實習期滿後，安排專車接載往機場，內地官二代的排場亦不過如此。還有實習生竟敢當面斥罵上司，實為這幾年受委的港人狠狠出了口氣，而事後那間機構差點頒下永不錄用港生的指令。
直升機家長，孕育魔怪港孩，合體共行所向披靡。想着想着，竟閃過一絲不如安插吳總公子入職的念頭。
盧先亞