鄧紫棋（G.E.M.）除咗聯想到金魚嘴、巨肺、時裝災難……之外，其實佢都「出名」係基督徒，佢曾經喺社交平台分享自己創作《Twinkle II》嘅經歷，當中就係同佢嘅信仰有關。

唔知係咪就係因為G.E.M.好虔誠嘅關係，近日有傳佢導咗男友Mark Ngai信教，日前Mark喺自己個Instagram宣佈已受洗，更以不開名方式去感謝一個人「陪自己走過」，外界一般相信Mark指嘅就係G.E.M.。其實Mark信咗教都好嘅，因為有信仰支持，先可以配合到09年曾自爆係處女嘅G.E.M.堅拒婚前性行為嘅選擇。當日G.E.M.同台灣男歌手林宥嘉（Yoga）拍拖時，就有傳正值血氣方剛之年嘅Yoga因頂唔住G.E.M.唔「曳曳」嘅要求而甩拖……（新聞連結： http://bit.ly/2wUEEdF ）

除咗好似G.E.M.呢種引導男友信教嘅例子之外，圈中有好多基督教教徒情侶，佢哋嘅共通點係——堅拒婚前性行為。不過通常都係適用於兩人都係教徒嘅例子，好似今年舉行嫁禮嘅王君馨咁，佢老公Daniel係其初戀男友，同時亦係虔誠基督徒，所以婚前堅守貞操！就算後來先信教嘅王君馨，後來一度與Daniel分手，但都仲係保住處子之身，更爆嘅係佢喺2012年發表嘅「處女論」，故此佢獲封做「處女黨」成員之一。

而處女黨另一成員李亞男，同老公王祖藍同為基督教教徒，兩人拍拖時亦堅持絕不破戒，靠信仰支持。

至於上星期入紙、現年27歲嘅「邦民女」陳嘉寶（Anjaylia），佢同身家有半億嘅初戀未婚夫黃頌祈亦係基督徒couple，兩人都係虔誠教徒，一早講明婚前性行為免問，Anjay仲好自豪自己守得住最後防線，又話呢份「禮物」係由上天賜予，所以要等結婚嗰晚先嚟「拆」。