籌款最緊要係乜？一要夠飛士、二要夠叠友。學校籌款又點？最緊要係夠多猛料校友囉！好似華仁書院咁，佢哋嘅「華仁一家基金會」，發起「華仁一家為將來」籌款，為九華同港華嘅小師弟提升教育質素，首階段目標係籌1億銀。頭炮係10月7號步行──由九華行去港華。
籌1億，係咪高難度？有基金會主席吳天海就冇難度，事關佢一吹雞，基金會兩個董事經已各認頭1000萬，一個曾係二少李澤楷喺8號仔嘅得力助手、1970年畢業嘅九華校友番薯丸袁天凡，雖然佢同身兼有線寬頻主席嘅吳天海，喺商場上係曾經係對立關係，但撐母校都要放低私人恩怨；另一個係港華嘅JamesLoh（新加坡基金JLCapital創辦人）。

至於吳天海捐幾多？低調務實嘅海哥只強調，唔只捐錢仲行埋一份，但就點都唔肯講捐幾多。又係嘅，有心咪得囉。
除咗一眾男子組，同場仲有前電盈要員兼Richard前得力助手梁胡雪姬。表面睇嚟，兩間和尚寺同梁太風馬牛不相及，但已經退下火線，兼專心做學校義工嘅梁太話，原來佢係基金會顧問，𠵱家主業係幫手籌款，副業係傍住番薯丸。咁二少Richard會唔會慷慨解囊？梁太話，「Francis（袁天凡）會搞掂（Richard）㗎喇。」不過，如果Richard要捐，係咪應該捐去StPaul嗰邊呢又？
海哥又話，籌款所得會用作投資，賺到錢會為母校作育英才，相信袁天凡等幾位董事一定會昅住基金嘅投資，至於步行籌款，佢預期有超過2000人參加，而特首校友權權，經已應承主持開步禮，袋巾校友梁家傑亦都應承出嚟行。除咗步行，遲啲仲會有高爾夫球日、電影首映、餐舞會，同埋跟商業銀行合作，發聯名信用卡，咁嘅格局、咁嘅陣容，莫講話籌1億，10億又有何難？
[email protected]