【李八方online】建制區議員偷相做頭像 游蕙禎:民建聯淪落到同本土派道歉
植潔鈴民建聯李八方ONLINE游蕙禎Telegram
有「游BB」之稱嘅青年新政游蕙禎,先唔講佢因為樣貌標緻被網民封為女神,佢2016年因為宣誓風波被褫奪立法會議席,中央當時仲釋過法,咁大件事噃,相信唔少市民、特別係留意時事同政治嘅人,都會認得游蕙禎個樣啩,但民建聯東區區議員植潔鈴竟然「唔認得」,仲用咗游BB張相做Telegram頭像。點解有自己相唔用,確實好可疑,尤其Telegram最近喺去大台化嘅「反送中」示威活動中有重要角色,示威者用此互通消息,所以游BB都喺Facebook公開事件,提醒用Telegram嘅人,記得要提防呢類盜用人哋個樣然後加入情報群組嘅人,仲寸埋「克警」,形容「警員唔show委任證,議員唔show自己樣」,實在係5,000年兵法最高境界。
游BB仲一併上載同植潔鈴嘅電話對話,質問對方做乜用佢張相?植潔鈴好似有備而戰,話自己係透過app嘅web search功能搵到張相,見到:「啊!都幾靚女」,就用嚟做頭像囉,有朋友提醒佢之下,先至如夢初醒要換相喎,佢仲反問游BB,呢個係佢私人號碼,點解游BB會發現到?查實Web search功能必須打關鍵詞先會出結果,八方試過打「美女」、「靚女」、「港女」,都搵唔到游BB嘅相,要打「本土派」同「游蕙禎」先至搵到,唔知植潔鈴又用咩關鍵詞,搵到游BB呢張靚相呢?而就算係靚相,如果行得正、企得正,點解唔喺Telegram現真身?
八方都問過游BB,佢話偷嘢真係唔啱嘅,尤其冇問過人就攞人啲嘢亂咁用;對於植潔鈴一度話唔太認得個樣係佢,游BB直言有啲擔心對方噃:「作為政治人,應該認識身邊唔同立場人士嘅樣啩」,又話自己打去理論都係費事對方、甚至民建聯「好大鑊」,「如果民建聯啲FANS、啲街坊誤會咗佢(植)入咗本土派,咁就唔好啦。」
被游BB篤爆偷相嘅植潔鈴凌晨時份喺fb發片回應,自稱「唔小心做左(咗)新聞焦點」,話Telegram近期好流行所以想「了解下」,又覺得Telegram唔用真名真相係常態,只係揀頭像時「好好彩」揀中咗游蕙禎嘅相,堅稱真係唔知係「游小姐」,但用咗對方張相係事實,所以再向佢道歉。
雖然道歉得嚟都有啲唔甘心咁,但游BB大人有大量,佢喺fb回應時不忘諷刺一番:「民建聯淪落到要同本土派道歉,陰功。下次唔好啦,游區議員。冇嘢睇lu。收工。」
-----------------------------
民陣G20「Free Hong Kong」集會
日期:6月26日(三)
地點:愛丁堡廣場
時間:20:00-21:00
-----------------------------
登記方法:
。親身取表填寫及郵遞
。網上登記(可用手機登入,在選舉事務處網頁打開REO-1表格,使用免費手機應用程式Adobe Fill & Sign打開表格,再按指示填寫資料,按儲存文件並以點擊分享,再電郵至
[email protected])
詳情可參閱選舉事務處網頁:
https://www.reo.gov.hk/ch/voter/gcnr.htm
市民可從以下網址查閱選民資格:
https://bit.ly/1PAPC7N
-----------------------------
7月4日起 《蘋果動新聞》只限升級壹會員閱覽
繼續撐蘋果!
https://hk.adai.ly/e/iIRREmuwDX