恒隆地產（101）主席陳啟宗出名口若懸河，佢講talk肯定冇悶場兼有金句派，佢位大公子陳文博平時見到傳媒唔多出聲，估唔到遺傳咗爸爸鍾意演講嘅天份，今年開始，佢到本地大學講talk，分享自己點樣打理家族生意，兼且賣吓藥，介紹恒隆業務。
34歲嘅陳文博現為恒隆高級經理（董事辦公室），喺恒隆工作6年，主要跟住董事總經理陳南祿學做生意，做咗咁多年，點都有啲心得同睇法。
今年3月，佢去咗中大酒店及旅遊管理學院，幫學生組織Hospitality Student Initiative，向幾十名不同地區嘅大學生，介紹恒隆業務，又講何謂EST，即係Experience、Service同Technology計劃。
上個月，佢又去科大做客席講師，為工商管理碩士（MBA）學生，講解家族企業係點樣，佢又如何接班等等，聽聞反應不俗。