第74屆威尼斯影展於日前開幕，今年大會向影壇巨星79歲嘅珍芳達（Jane Fonda），以及81歲嘅羅拔烈福（Robert Redford）頒發終身成就金獅獎殊榮，兩人為合作新片《Our Souls At Night》於影展上舉行首映禮，兩人由戲內到戲外都表現煙韌，於盛會上又拖又攬，在台上接受終身成就獎後，珍芳達更感動落淚。

珍芳達今次由囝囝Troy Garity陪同出席，而佢同羅拔烈福早於60年代起已經合作，稱得上是影壇最佳拍檔，而今次新片《Our Souls At Night》亦有兩人親熱戲，珍芳達笑言同羅拔烈福由後生咀到老，大讚拍檔係個接吻高手。