英皇前小花最為人印象深刻有3T，轉戰台灣嘅成員蔣雅文（Mandy）近日返咗嚟香港，喺中環開期間限定店賣自家設計tee同環保袋，Mandy仲趁空檔約咗鄭希怡（Yumiko）去食飯，不過就唔見另一位舊隊友劉思惠（Maggie）。

3T自05年拆夥後，三女都各自組織咗幸福家庭，但各有各忙好少聚頭。Maggie全面退出去咗中環名店做sales，佢今年1月仲幫圈外男友小Mo生咗8磅囝囝Aidan，人母Maggie仲成日將得意仔嘅相貼facebook同大家分享。

Aidan眨吓眼都7個月大，肥嘟嘟好可愛，佢已經學識坐，Maggie仲買咗車仔畀囝囝喺屋企碌嚟碌去好過癮。Aidan唔知係剃咗頭，定係頭髮唔多，不過佢個光頭look好襯佢，頭形好靚，見到都忍唔住手想伸去摸吓，連媽咪Maggie見到都伸晒脷，好鬼馬。

Maggie有仔萬事足，相中所見，佢帶囝囝入戲院睇《蟻俠》，又去鋸扒，雖然Aidan仲好細冇得分享電影同美食，但當佢大個咗睇番呢啲相，都未嘗唔係一個好回憶。