當年今日
關於我們

股場放大鏡:平嘢無好泛海又供股 - 歐陽風

蘋果日報 2008/01/11 00:00


雖然美股隔晚回升百多點,但長實(001)有策略投資者配售沽貨,打殘晒啲地產股,市傳配股嘅係鄧普頓,假如屬實,反映有長線機構投資者開始覺得地產股到價要減持。
大地產股有唔好消息,細嘅地產股亦都有,泛海國際(129)昨日復牌宣佈2供1供股集資,股價勁跌16%,唔怪之得佢個長期起樓拍檔Grosvenor都要沽貨離場。
泛海以每股0.18元供股,集資6.52億至7.96億元,供股價較泛海停牌前每股0.28元收市價折讓35.7%,集團指供股集資所得擬用於日後收購香港、澳門及中國之發展項目。
泛海繼06年底3供1之後再度出招供股,習慣同佢計NAV嘅投資者,應該明白呢間嘢點解升極唔起,郁吓就問股東攞錢,NAV折讓幾大都無用。根據去年公佈之中期業績,泛海06年供股後資產負債比率由34%降至24%,業績期內再降至20%,低負債之餘,泛海近期只投資過北京一個住宅項目億幾銀,係咪真係咁大集資壓力,大家諗吓就知。
集團上半年純利急增1.9倍,但係股價刺激唔大,長期PE僅單位數字,資產折讓亦超過50%,平嘢果然係有平嘅理由。有啲股票,大股東根本唔介意股價長期低迷,賬面富貴對佢嚟講意義不大,最好長期低殘,方便日後私有化。
中國通脹嚴重,估計12月份通脹高達6.6%,因此溫總以「通脹猛於虎」為施政大前提,除咗強制電費、天然氣及成品油價格不能加之外,普通商品相信都好難加價,本周美林才發出報告預期維達(3331)等主要紙巾商聯手加價,好可能都要Hold住先。
商品唔准加價,即係唔顧企業盈利,正當全球商品尤其係農產品持續供不應求之際,點可能用行政指令唔准加價?呢個強制唔准加價訊息,係一個好壞嘅訊號,提醒大家買緊嘅中資股,政策風險一啲都唔細。