【去年底公開插男友瞞婚】42歲陳昭昭年尾又嫁番佢 擺50圍:唔想寒酸

蘋果日報 2017/07/13 15:55

結婚天主教柬埔寨陳昭昭

今年42歲嘅藝人陳昭昭,早前發現拍拖兩年嘅李姓男友瞞婚(新聞連結: http://bit.ly/2uTXeB9 ),不過事隔半年多,已雨過天晴,仲好事近!兩人訂於今年12月7號喺香港擺酒50圍,趕今年雙春兼閏月,下個月更去柬埔寨皇宮影婚紗相。
昭昭今日接受電話訪問,佢大方承認好事近,問到佢男友係咪已經搞清楚離婚手續,佢話:「係呀!年底會喺何文田間ClubONE擺50圍酒。知道佢已經搞清楚,佢有啲法庭證明文件俾我睇。早排已經試婚紗,8月去柬埔寨皇宮影婚紗相。已經訂咗酒席擺50圍,因為雙方都有好多親戚朋友多,又有演藝界朋友同外國朋友。會晏晝行教堂,夜晚擺酒。」
講到婚宴,昭昭希望可以搞得靚啲,唔想寒酸,有啲禮物、又搵啲藝人唱歌,已經答應嘅有李國祥同杜大衛,仲想搵陳欣健做婚禮司儀,節目未諗晒,又搵咗以前TVB嘅一位監製做導演直播去YouTube,佢話婚後會不設防,未來老公鍾意囡囡,昭昭本身就冇乜所謂,仔女都係神嘅安排。
至於,註冊會稍後去排,打算10月、11月先做,因為昭昭同未來老公都係天主教徒,要等神父搞婚姻法庭嘅手續:「男朋友離婚要將啲文件送去梵蒂岡教廷處理。」昭昭話男朋友已經排咗9月洗禮,現在佢已經上緊讀經班。
相關文章:
【「貪錢就唔會搵個破產」】未婚夫若欺騙感情 陳昭昭揚言追討聲譽損失
http://bit.ly/2uTXeB9
【開記招】傳戀人夫兼騷擾大婆? 41歲陳昭昭:最大嘅受害者係我
http://bit.ly/2fYoHsH