【輸個馬鼻】城城恨買度假屋同老婆仔女騎馬BBQ

蘋果日報 2014/01/26 06:00

英國馬場奧雲城城天台女主人馬房

城城郭富城今日特登將個頭吹到好高好高,但都敵不過奧雲一雙蠱惑的鞋。頭先奧雲大讚城城好親切,城城都話:「大家都叫佢Owen仔,好親切。最深印象係睇世界盃,覺得佢好靚仔。」講完之後城城即向做緊電視台訪問嘅奧雲話:「Youaresohandsome!」奧雲即謂:「我也說同一樣的話。」

城城表示同奧雲共同興趣係養馬,仲話要跟佢學習:「我知道佢喺英國有馬房,有90幾匹馬。頭先我介紹我個練馬師佢識,原來佢哋一早識,呢個圈真係好細。」

講講下,城城又自爆之後再以個人名義抽馬:「一係叫做『唱這歌』或『動起來』,我想叫『唱這歌』,感覺舞台啲。」再問佢會否叫奧雲請佢去英國參觀其私人馬房?城城笑道:「不如我贏咗,請佢嚟拉頭馬,我出機票住宿。」不過佢都話好羨慕對方可以養成百隻馬:「但香港不夠地方,不似英國咁大,有牧場。」

香港冇牧場,但係城城有個大天台。佢話諗住退休後將愛駒放喺屋企個天台養:「我整真草皮,我天台有個籃球場,但唔知得唔得。其實我最想好似英美咁,有度假屋,有花園,可以養馬,又有大山坡,希望將來同太太仔女喺嗰度騎馬同BBQ。」但家陣女朋友都未有喎?呢個夢想豈非要等好耐?城城笑笑:「人生要有夢想,呢個係白日夢。」

咁不如搵個女主人先啦,城城就好鬼馬咁話:「搵女主人唔係問題,做丈夫要有更好心理準備,事業要得到多榮譽。(你已經係舞台王者喇喎!)但唔可以話:『太太,你嫁俾我啦,我係舞台王者嚟0架!』可以俾本存摺佢睇,自己仲要努力儲錢。我太多嗜好喇,要養馬,買resort,要有晒呢硬件先得。」唔使儲嘛?身家大把啦,城城謙稱:「我都捱緊,香港養馬貴,一闊三大,做船長又話要有隻船先得,我想買隻大船。」記者笑言女主人有排等,佢都有啲「黯然」:「係呀,我都有排先達到目的,唔知點算。」