腦癌童徵求「微星小超人」

蘋果日報 2002/01/11 00:00


十二歲的俊仔,半年前患上腦癌,現需每隔六星期入院接受化療。患病後被迫停學,一直堅強地與癌魔搏鬥的俊仔,一顆赤子心靈內有個簡單願望,惟盼讀者玉成。
天真爛漫的俊仔說:「我好鍾意『微星小超人』系列嘅模型,呢兩年靠用儲起嘅利是同零用錢,每次只可以買十幾蚊一個嘅模型,𠵱家已經收集到四十一個。但全套總共有五十二個模型,重有十一個型號我冇辦法買到,我嘅願望係盡快集齊全套模型。」

模型已賣斷市
俊仔去年暑假因感冒不適求醫,豈料被驗出患上腦癌。「醫生發現我對眼斜視,即刻安排我去醫院檢查身體。我最記得之後有一日,當我喺屋企睇緊微星小超人卡通片嗰陣,醫院突然派救護車嚟接我入院。之後成個暑假我都喺醫院留醫,最近啱啱做咗兩次化療,影響到手腳好多時震得好緊要,覺得好辛苦。」
俊仔除盼身體早日痊愈外,更渴望可集齊已經賣斷市的微星小超人模型。「幾個月前,我喺將軍澳一間玩具舖見到我想收集嘅型號,我趕返屋企攞錢,點知再到間舖已經畀人買咗。老闆話嗰幾款型號喺日本賣晒,香港都好難有存貨,如果上次買咗嗰幾款微星小超人模型嘅朋友,肯將啲模型轉讓畀我就好喇!」可愛的俊仔期盼着說。
俊仔欠缺的十一款微星小超人模型的型號如下:029,033,039,040,041,042,043,045,047,048及053。
讀者如欲幫助俊仔達成心願,可致電本報:29908688,或致電「願望成真基金」:25792402,該基金屬國際性非牟利慈善組織,一向致力協助十八歲以下患危疾兒童達成心願。

暖流熱線
電話:29908688
傳真:23702192
電郵:[email protected]
網址: http://www.charity.atnext.com