開季以來，沙田草地未試過用全闊A跑道作賽，而只係分別用過B、C、C加3欄。
嚟緊一次日馬既唔係跑周六抑唔係周日，而係下星期一中秋節翌日公眾假期。當日十場沙田日馬八草二泥，屆時草地唔使再移欄作賽，事關當日將會係今季田草首次用全闊A欄跑馬。
下周一賽事中，現時排頭三位之馬房葉楚航、方嘉柏同徐雨石出馬都多，後兩者合共有18匹正選馬，前者則13駒報名做晒正選，未跑已達成馬房部署初步目的，對台前幕後發動攻勢有利。
13匹葉廐正選馬接近一半季內跑過，計為「神朗」、「神電金剛」、「真慷慨」、「錦繡河山」、「君子協定」同「榮光大道」，後駒剛啱9月16號贏完谷草四班千二，相隔約莫兩星期，下周一就會轉戰泥地千二，班次則高咗一級，對馬匹本身嚟講係一種挑戰。此駒上季試過五升四連捷於泥地，今勻四升三由谷轉泥可唔可以照辦煮碗，到時就有答案。