港姐好多都係家姐選完到個妹選，如果係阿媽參加過選美，阿女又係國際小姐澳門代表，真係難得!國際小姐澳門代表嘅麥嘉欣（Sofia Paiva）同香港代表王詠珩（Wing）今日喺《蘋果》娛樂直播節目，問到聽講媽咪都選過美？麥嘉欣話：「係，媽咪，仲有爸爸個家姐都選過。」麥嘉欣仲即場講葡文﹕「大家好，我叫麥嘉欣，喺澳門出世。平時同屋企人都會夾雜中葡語，但唔會全部用葡文溝通。開心家人好支持我，因為參選期間本身訓練好辛苦，唔支持好難行。」

有咩生活小秘密？
麥﹕我鍾意唱歌跳舞，去旅行。
王﹕畫畫、唱歌、跳舞

鍾意嘅男仔類型？
麥﹕有責任心，腳踏實地，對住你好sweet，但對其他人要型型地，唔好咁sweet。
王﹕有上進心，笑容燦爛，成熟。

之後代表澳門及香港參選有冇信心？
麥﹕信心要慢慢build up，我係好冇自信同細膽嘅人，但會好努力好努力去做，就自然有信心。
王﹕同意，信心一定要有，家人都好支持我，對我無微不至咁照顧，成日煲湯，我做完嘢返去夜，都會專登起身整嘢畀我食。

識唔識煮嘢食？
麥﹕我都識，屋企嘅女性都煮得好好食，我有偷師。
王﹕喺外國生活都係靠自己，我都識煮。