張智霖(ChiLam)同胡杏兒今日喺鯉景灣為新片《死亡通知單暗黑者：首部曲「雙龍會」》(暫名)開工，劇情講述ChiLam向杏兒求婚，合照時，兩人重做一次求婚過程，不過張智霖堅持唔肯跪，為杏兒帶上求婚戒指時，又唔知帶邊隻手，最後要由杏兒提點。

受訪時，ChiLam指住杏兒手上戒指話：「堅嘢嚟㗎，幾有誠意，2卡幾㗎！」問ChiLam點解唔肯跪？佢笑住話：「跪唔係重點，我見到呢隻鑽戒都嚇一嚇，點會咁勁㗎！」係咪老闆蕭定一嘅私伙？ChiLam表示係廣告客戶贊助，笑指可能拍完，廣告商會送畀杏兒，杏兒即刻話：「我都想呀！」

講到當年向袁詠儀(靚靚)求婚，ChiLam表示：「當時我哋喺新加坡，懶係勁，喺酒店房入面我話有禮物，佢以為係咩啦，其實係耳環，佢就帶點失望，見佢咁失望，我話其實仲有嘅，O依家覺得笨，點解買多對耳環㗎，直至今日，佢都冇帶過嗰對耳環。」靚靚當時係咪即刻話「好」？ChiLam笑住話：「其實都係兩情相悅，冇咁多繁文縟節。」杏兒透露當年老公求婚時都有跪：「佢唔係跪咗好耐，跪咗幾秒，好自然反應，叫佢起番身，o依家好後悔，應該叫佢跪耐啲，一世人跪一次。」ChiLam即刻話：「如果下次再跪，就應該瀨咗嘢，你都希望佢一世跪一次啦，所以我永遠男兒膝下有黃金，永遠唔會跪，唔瀨嘢就得。」

對於「胡說八道會」好姊妹黃智雯有傳今年結婚，日前佢透露一直未定婚期，要睇下邊日係好日子(新聞連結： https://bit.ly/2H3rrCp )，問杏兒會唔會贊助婚紗﹖為對方擇好日﹖杏兒話：「嘩，呢個要問番佢。」在旁嘅ChiLam好奇咁笑住話：「搞錯呀，少少都唔講嚟聽吓！」杏兒於是就話：「總之越早越好啦，因為要度期。」ChiLam又八卦咁問：「Book咗幾時﹖」杏兒笑指要保持神秘。

精選娛聞，喺晒《娛果》
http://fb.com/appledailyent