今日以前港島區立法會議員身份出席民主派港島區補選候選人區諾軒造勢大會嘅公民黨陳家洛，發言時大爆區諾軒威水史，透露佢呢位中大師弟曾經係香港政治科學學會嘅最佳論文獎得主，呼籲巿民投票支持呢位讀得書嘅年輕人，區諾軒話嗰篇文主要寫2003年東區同深水埗區嘅建制派動員有何變化，再講出威權主義嘅政權有咩變化，當年嘅指導老師係中大教授馬嶽。

至於家陣，陳家洛另一知名學生則係香港眾志周庭，總舵主話有留意周庭游水嘅選舉宣傳片，當周庭得知家洛都曾經係男飛魚、曾經係港隊預備隊成員時，不禁高呼：「深藏不露啊！犀利！」

對於泳裝上陣宣傳片至今有成6萬點擊率及逾2000個like，周庭話好多謝每一個睇、支持同分享呢短片嘅人，希望大家畀心機令更多人知道3.11要投票，「唔好睇少自已嗰一票，又或者覺得民主派贏硬，就唔出嚟投」。

周庭透露短片喺被DQ前喺九龍東一間會所泳池所拍，由晚上十點半拍到凌晨三點，雖然係室內暖水池，但唔知點解拍攝時泳池已關咗暖水裝置，期後開番時亦唔太暖，令佢捱住凍拍攝。但佢都好享受拍攝過程，因為佢真係好鍾意水中世界，佢做【八方相當年】主角時都分享過游水感受。問到泳衣上鏡有無心理壓力？周庭話無，「因為游泳本身係一件好健康的事，我以前操水都係咁」。

重溫周庭【八方相當年】： https://hk.news.appledaily.com/local/realtime/article/20180101/57645851

【倒數7日】立會補選新聞，《蘋果》一網睇晒
https://hk.feature.appledaily.com/legco2018/