森美、陳柏宇等今日在佐敦出席活動，對於商台今日宣佈取消明年1月1日舉行「叱咤樂壇流行榜頒獎典禮」，打入「我最喜愛的女歌手」最後五強的謝安琪，以及殺入最後五強「我最喜愛的男歌手」的陳柏宇和姜濤均有現身，不過謝安琪因生病而未有受訪。

至於森美表示宣佈取消的前一晚才知道，坦言感到有點失望：「始終要顧及當晚嘅觀眾同歌手嘅安全，所以都冇辦法，以我所知係會繼續頒獎，但咩形式就未知，其實我聽講係因為保險問題。」森美直言與歌曲《願榮光歸香港》無關：「樂迷投票，你投我就頒，我記得雨傘嗰年嘅《撐起雨傘》都有獎項。」不擔心《願榮光歸香港》得奬而受到打壓，影響商台續牌？森美說：「香港區議員都可以做到區議員嘅時候，嗰個奬點會頒唔到呢？我哋覺得投票就係市民嘅聲音。」

陳柏宇表示：「開頭兩個取消咗，心態係唔緊要，要取消都冇辦法，因為當時仲有一個頒獎禮，而家取消埋，都未識反應，咁多年都未試過，但尊重決定。」對於好友周柏豪做老竇，陳柏宇說：「恭喜晒，我而家先知道，噚日定前日搵過佢，佢都冇講。（咁秘密？）原來我哋冇咁friend，其實湊女好好玩，最重要頭幾個月，佢瞓你就瞓，如果唔係冇覺好瞓。」

至於姜濤則說：「本身入咗五強，對我嚟講係意想不到嘅事，所以冇乜話可唔可惜。」組合MIRROR亦打入「我最喜愛的組合」五強，成員陳卓賢（Ian）亦說：「入到圍已經好開心，名單上全部都係前輩，可以同佢哋擺埋喺同一個名單，我哋已經好開心。」MIRROR經理人花姐表示MIRROR已準備戰衣參與頒獎禮，現時只好留待明年。

採訪：黃曉妍
攝影：林賓尼

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇