陳冠希（Edison）同秦舒培喺舊年5月被《蘋果》踢爆戀情，事隔一年多啲啲，Edison已經做埋老竇，都咪話唔快手，其實佢哋嘅戀情都幾峰迴路轉。

喺去年5月當時同台灣女友洪文安（Ann）分手年半嘅Edison，被《蘋果》影到同嚟緊生埋日就28歲嘅大陸model秦舒培喺晚上現身大坑拍拖，拖手、錫錫樣樣齊，當時仲有指佢哋已經拍拖年半。

佢哋嘅戀情曝光之後風波不斷，先係秦舒培前夫華誼兄弟時尚文化傳媒董事總經理趙磊喺社交app指佢哋仲未離婚，而之後秦舒培就喺微博還擊，表示一早簽署咗離婚協議書，仲爆趙磊疑有新歡。最後，事件喺疑似小三現身道歉，堅稱話係問趙磊借衫自拍之下不了了之。

隔咗冇耐，Edison突然喺微博怒罵林志玲，有傳秦舒培原本有份參加大陸節目《我的新衣》，最後因為林志玲而被飛，Edison因此代女友出頭。事後林志玲出席活動回應事件，佢仲喊晒口咁話：「傷心委屈」。事件最後就由一位自稱係《我的新衣》合作嘅代理經紀公司代表「紳士風度香」喺網上道歉而落幕。