林家棟監製嘅電影《死開啲啦》今日喺堅尼地城宣傳兼預祝中秋,演員林德信、J.Arie(雷琛瑜)、河國榮等出席,佢哋一齊炮製薑絲雞同埋互餵食月餅,林德信話之前舉行優先場後,好多學生都喺網上講佢哋戲中對白,J.Arie就話:「之前父母都睇咗,自己都好緊張佢哋反應,佢哋話成部戲冇冷場,由頭笑到尾,亦有話我演得自然。」
今次係J.Arie第一次拍戲,林家棟話都希望佢可以提名到新人獎,咁J.Arie呢?佢話未諗呢一步咁遠。問家棟想唔想再獲獎?佢即笑話如果有,多多都唔拘,但反而自己挑戰嘅唔係獎項,今次起用咗好多新人,希望觀眾接受。
問林德信想唔想再同J.Arie繼續情侶檔?林德信即話好呀,自己都鍾意同佢拍戲,J.Arie就笑話:「我可以喺幕前名正言順抽水。」驚唔驚畀佢fans攻擊?J.Arie話都怕0架,男神喎,林德信亦笑話驚佢嘅fans多啲。