當年今日

地產多聲道:九倉員工去飲唔賣樓

蘋果日報 2003/09/15 00:00


通常公司有人辦喜事,同事頂多都係早啲放工去趁熱鬧,不過,九倉老臣子,夏利文地產營業經理梁秉權,就真係有天大嘅面子,一班員工為慶賀佢嫁女,集體休假暫停賣樓一日,齊齊去觀禮兼去飲,認真畀面。
九倉助理董事黃光耀解釋,由於乖女出閣係梁Sir嘅人生大事,一場同事多年,都為佢高興,所以破天荒決定,全線新盤售樓處當日休息一天,等同事可以全程盡情參與梁Sir嘅嫁女婚禮。大日子係幾時呢?就係嚟緊嘅星期三,即係十七號,想買九倉樓嘅讀者,就要記住呢個特別嘅日子,唔係到時摸門釘就無謂啦。
講番梁Sir,今日起會放一個禮拜大假,佢噚日喺擎天半島售樓處,收到好幾份賀禮,黃光耀就送咗條口水肩,免得梁Sir外父見女婿,流口水喎。中原劉大姐就贈名酒,飲得杯落咁話。

華懋豪宅借月亮宣傳
今年樓市喺中秋節大翻身,代理同發展商自然四萬咁口,做到生意,荷包腫脹,會諗擦番餐好嘅,中原一眾高層,早幾日同華懋吳崇武,喺一間五星級酒店嘅馳名鐵板燒餐廳過節,食品包括大頭蝦、龍蝦同帶子,諗起都流口水。
吳生當日重送咗份過節禮物畀中原,就係淺水灣豪宅129淺水灣嘅夜景相片,明月高掛映照下,物業流線型嘅外觀,顯得非常獨特,意境構圖重夠晒應節㖭。蘭西就覺得,吳生好識把握宣傳機會。
賓館路邊賣廣告招內地客
中央放寬內地人自由行來港限制,一時間大量旅客湧入香港,搞到酒店房間供不應求。其實,好多內地客都唔介意住得差一啲,留番多啲錢購物,所以賓館生意應該重好景。但係有商機都要識爭取,因為內地客唔知邊度有平價賓館。
蘭西最近經過佐敦,見到彌敦道馬路邊有塊賓館廣告板,列明房租價錢同電話,相信係等啲內地客經過睇到幫襯,果然夠醒目。蘭西查過,間賓館就喺個廣告板隔籬。

施念慈睇樓經紀變護衞
明星參觀示範單位,已經唔係咩新奇事,舊年底買入尖沙嘴擎天半島嘅才女施念慈,噚日現身長沙灣宇晴軒喺佐敦嘅示範單位。蘭西聞風,即上前了解施小姐今次嘅來意,點知負責嘅經紀,竟然搖身一變成近身護衞,喝止一眾記者採訪拍照,使唔使咁惡呀?!
反觀施念慈全程面帶笑容,重好大方企定定回答記者問題,佢話:「今日嚟睇吓先,未知會自住定投資。」當被問及對樓市睇法時,施小姐樂觀咁答:「樓價應該會上,自己會再睇吓其他樓盤,好似薄扶林貝沙灣、鴨脷洲深灣軒等。」唔通佢又想掃貨?

代理為跳bar貼錢畀買家
發展商想賣多啲單位,都會搵代理幫手,重搞好多比賽推動佢哋努力搵客,例如促成某一宗數就可以跳bar。由於每跳一個bar,佣金會多好多,所以代理千方百計都會爭取多啲成交,部份甚至會貼錢畀買家,即係唔使畀佣重有錢收,背後原因係湊夠條數,跳到bar計重有着數。估計發展商都知道代理呢啲招數,但就冇行動,背後原因係乜,唔使講都明啦。
蘭西
電郵地址:[email protected]
empty
129淺水灣喺一輪明月映照下,意境優雅。
empty
賓館路邊賣廣告招內地客
empty
施念慈昨日參觀宇晴軒,氣定神閒回答記者問題,反而個經紀(右)發惡。