妮歌潔曼(NicoleKidman)同安東尼鶴健士(AnthonyHopkins)前日齊齊去咗喺加拿大舉行嘅多倫多電影節,宣傳新片《TheHumanStain》。前日風頭躉妮歌一出現,即時成為全多倫多嘅焦點。
不過英國小報《世界新聞報》啱啱又喺噚日爆咗單料,話原來妮歌上個禮拜去咗紐約,第N次密會愛郎祖迪羅(JudeLaw),有人重影到妮歌喺幽會前,特登走去買好sexy嘅內衣,早前話要拍片而唔去威尼斯影展嘅妮歌,今次真係斷正!
前後腳離開
話說妮歌同祖迪羅上星期日俾人影到前後腳去紐約Carlyle酒店,據講佢哋喺酒店嘅1109號房逗留咗三個鐘,之後妮歌喺凌晨時分急急腳鬆人,祖迪羅就留到星期一中午先走人。不過好衰唔衰,佢兩個嘅行蹤俾人全程影低晒,難為祖迪羅重畀晒錢叫酒店員工咪爆響口㖭!
講番前日個影展,因為安東尼鶴健士喺《TheHumanStain》中同妮歌有唔少床上戲,但安東尼話同妮歌拍床上戲冇感覺,佢重懶得戚咁話:「我每日都係準時返工,背熟台詞,做完咪走囉!」不過安東尼咁講,我羅拉睇怕佢不過係怕咗企喺佢隔籬個老婆啫!